2021 թվականի մայիսի 27-ին Հայաստանի Հյուրանոցների Ասոցիացիան գումարեց արտահերթ ժողով, որի ընթացքում քննարկվեցին Ասոցիացիայի գործունեությանը վերաբերող մի շարք հարցեր:
Ժողովին ամփոփ ներկայացվեց նախորդ տարվա ընթացքում կատարված աշխատանքը, այդ թվում՝ պետական ատյանների հետ ակտիվ երկխոսությունը և դրա արդյունքները։
Խոսվեց նաև Ասոցիացիայի նոր ձեռքբերումների մասին, որոնք են գործընկերական համագործակցություններ մի շարք տեղական և համաշխարհային կազմակերպությունների հետ, ինչպիսիք են Al Jazeera -ն և Grant Thornton – ը , որոնք հնարավորություն են տալիս Ասոցիացիայի անդամ հյուրանոցներին ճանաչում ձեռք բերել նաև Հայաստանի սահմաններից դուրս։
Ժողովի երկրորդ փուլում անցկացվեց Ասոցիացիայի Խորհրդի անդամների ընտրությունը։ Խորհրդի անդամներ ընտրվեցին ՝ Apricot Hotels and Resort հյուրանոցների տնօրեն Հրանտ Գրիգորյանը, Armenia Marriott Hotel հյուրանոցի գլխավոր մենեջեր Կատալինա Սյուզանը, ibis Yerevan Center հյուրանոցի գլխավոր մենեջեր Միքայել Մայրապետյանը, Tufenkian Heritage Hotels հյուրանոցների գլխավոր մենեջեր Հակոբ Հակոբյանը, Republica Hotel հյուրանոցի գլխավոր մենեջեր Իննա Խոստիկյանը։ Խորհրդի նախագահ վերընտրվեց իբիս Երևան կենտրոն հյուրանոցի գլխավոր մենեջեր Միքայել Մայրապետյանը։ Գործադիր տնօրեն վերընտրվեց Լիլիթ Դանիելյանը։